[∞2009新聞∞] 【2009-11-19】東方日報：方平一席話鮑姐開竅

方平一席話鮑姐開竅

太太鮑起靜榮升金像影后，方平實在功不可沒。

入行超過四十年的方平見證不少藝人的起跌，對張曼玉及張栢芝的軼事尤其難忘，他還大爆愛妻鮑起靜榮升影后前，曾因失意而萌放棄，幸得他一語道破點醒對方。

方平認為電影工作不應有個人主義。

由加盟藝訓班、當演員、到擔任電影監製，方平差不多在娛圈度過半世紀，同時亦因為電影而與李連杰、方中信、吳彥祖等成莫逆之交，建立了一份又一份深厚的友誼，一向「順得人」的他更以「如果同方平做唔到朋友嘅話，你份人都好有問題」而自豪﹗談到圈中的「女猛將」，方平一開口便提到張曼玉（Maggie）及張栢芝。

情聖愛土女
「當年我同Maggie去美國拍《人在紐約》，拍攝期嚴重延遲，佢份人好有義氣又冇架子，竟然同我講唔使理陳自強（當年張之經理人），最緊要拍完套戲，幾時『交人』返港都冇所謂，佢每日收工就翹住我手去shopping﹗」方平憶述。「又好似栢芝咁，佢同我拍《旺角黑夜》最後一日戲，因為拍遲咗，本來要趕飛機北上拍《無極》，點知佢二話不說打畀助手改機票，話遲啲先報到喎！」

自認年輕時十分多情的方平，最終情歸他口中的「土女」鮑起靜，數十載婚姻無風無浪且誕下乖女。談到家中影后「遲來的春天」，方平不諱言：「佢嘅優點係純品與世無爭，但之前佢都有同我講，話自己份人咁冇所謂，點解人哋都唔畀啲好嘅機會佢，佢曾經有諗過唔再努力落去，我就同佢講『既然你咁冇所謂，係咪連呢樣都唔應該計較呢』。」被丈夫一針見血，鮑姐開始平常心看待，結果反而無心插柳，可見方平獨具慧眼。

李連杰電賀
談到與李連杰的友誼，方平坦言不會主動致電對方，但當鮑姐得獎，忽然接獲對方從巴西的「賀電」：「杰仔同我講，話佢同阿鮑都有獎座，咁我點喎，我咪同佢講，我會喺內地訂造個獎返嚟，放喺佢哋兩個（獎）嘅中間囉，問你死未？」

眼見影圈演員出現斷層情況，方平表示：「演員成功與否係市場定奪，演員係咁多個崗位中最舒服、但又最被動嘅。人嘅名氣可以賣到錢就OK，呢個圈錢可以堆砌一切，好明白點解有啲演員做嘢流於表面，但我覺得無論如何，電影係群體，絕對唔係個人作品囉。」由於年來頻與內地片商合作，為迎合各方所需，方平有感刻下很難培養「絕對香港式電影演員」。

文：影視組

From 2009-11-19 東方日報