[∞2009新聞∞] 影后鮑姐謝詞照剪

無綫前晚轉播《金像獎》，卻將內容剪得支離破碎，連出爐影后鮑起靜感謝亞視的得獎感受亦難逃一剪，激起觀眾、Fans、導演、藝人、影迷和網民狂插，轟無綫冇風度！

投身演藝事業多年的鮑起靜（鮑姐），前晚憑《天水圍的日與夜》，摘下「最佳女主角」殊榮，首嘗影后滋味！身為亞視藝員的鮑姐發表得獎感受，當中一句「多謝亞洲電視同事」，竟遭無綫剪掉！而蕭芳芳奪「終身成就獎」的謝詞，更被剪到不知所謂；側田獻唱致敬歌被Cut，令視迷未能一氣呵成，惹來全城怒插！

雖然無綫刪掉致謝詞，但鮑姐前晚得獎連踩三場，她往好友方中信舉行的慶功宴時，與老公方平咀足兩次晒恩愛。問到會否覺得無綫Cut謝詞小器？她大方地說：「在商言商在所難免，佢有權咁做，希望亞視啲人知道我有多謝佢哋！」而許鞍華、緋聞男女房祖名及薛凱琪、方中信夫婦亦到場分享喜悅。

「有檢討空間」

無綫總經理陳志雲昨日接受訪問時，對於金像獎被轟唔完整，他說：「明白，有啲遺憾，同事做到最好，但有檢討空間，頒獎禮難控制時間，雖然延遲一個鐘做編輯工作，都可能唔足夠，年年都有呢啲評語。（Cut咗鮑姐多謝亞視？）未睇到，相信唔會。（真係Cut咗？）呢個係電影界盛事，唔會因為人哋台而Cut，未了解件事，相信係時間上問題，咁做唔正確，絕對錯誤，從冇下達訊息要Cut，內部會做番啲嘢。（大公無私？）當然。（播番刪走片段？）可以。（蕭芳芳都Cut？）相信係時間問題，即刻叫佢哋今（昨）晚喺《娛樂頭條》同《東張西望》播！」

問到會否擔心被指小器？陳志雲說：「有呢個憂慮。（睇完有乜感受？）改善空間有好多，表演被Cut好可惜。（同金像獎方面傾？）事後檢討。（訪問鮑姐？）絕對願意，但要睇佢份合約。」對於爾冬陞為事件大感嬲怒，陳志雲表示會了解並道歉：「希望佢唔會唔開心。（同鮑姐道歉？）佢做電視台會明白。」

狂收19宗投訴

而無綫外事部副總監曾醒明表示共收到19宗投訴，包括蕭芳芳及鮑姐致詞被刪。問到是否小器？他說：「唔係，收費台有播鮑姐訪問，當佢影后咁報道！」廣管局方面亦收到15宗投訴。而前晚金像獎平均收視為28點，最高有29點。

有線昨晚則由主播以口述形式，講出無綫未播出的片段「贈興」，並命名為「第二十八屆香港電影金像獎：錯過的精彩」，認真啜核！無綫昨晚《東張西望》急「補鑊」，重播鮑姐感謝亞視的得獎感受。而網民在討論區狠批無綫做法離譜兼小器，不尊重別人，有失風度，有網民指「睇到發火」兼「O嘴」！

鮑姐（右）和許鞍華拿着金像獎笑不攏嘴，儼如大細路。

鮑姐前晚得獎後，連踩三場慶功宴，與大家分享喜悅。

網民在討論區狠批無綫做法離譜兼小器、不尊重別人，應獲最差剪接獎。

四名獲獎者呂筱華（左起）、鮑姐、陳麗雲和許鞍華，在慶功宴上碰杯。

附件: 您需要登录才可以下载或查看附件。没有帐号？注册